Qaraxyo isku wakhti ah oo ka kala dhacay Boosaaso iyo Hargaysa

(Hargaysa, October 29,  2008 Ceegaag Online)

Inta la hubo 19 ruux ayaa geeriyootay in ka badan 30 qofna waa ku dhaawacmeen  ka dib markii qarax saddex-geesood ah lala beegsaday Xarunta Madaxtooyada Somaliland, xafiiska isku xidhka  Itoobiya iyo Somaliland iyo rugta ay hay’adda  UNDP ka deggantahay magaalada e Hargeysa.
 
Dadka dhintay ayaa la sheegay in uu ka mid ahaay Xoghayntii Madaxtooyada Somaliland Daahir Cali Ciid, Odayaal ku sugnaa Madaxtooyada   iyo Ciidamo ka tirsanaa Ilaalada Madaxtooyada.

Afhayeenka Madaxtooyada Somaliland Saciid Cadaani ayaa Laanta Afka Soomaaliga ee BBC-da u sheegay in Qaraxa lala beegsaday Madaxtooyada uu ahaa mid xooggan oo burburiyay gaarigiisa oo yaalay Madaxtooyada iyo qeybo ka mid ah dhismaha Madaxtooyada.
 
Qaraxyadan waxaa ka hadlay madaxweynaha Somaliland Daahir Rayaale Kaahin oo sheegay in Somaliland ammaankeeda la soo handaday, wuxuuna shacabka Somaliland ugu baaqay in ay soo sheegaan cid kasta oo ay u arkayaan in ay nabadgelyadooda ka soo horjeedaan.

Dhinaca kale Wararka naga soo gaadhaya Magaalada dekadda ah ee Boosaaso ayaa tibaaxaya  in ay labo qarax oo waa weyn lala beegsaday xarumo ay degan yihiin ciidamada sirdoonka ee dawladda Puntland.

 Xaalada Magaalada oo dhan waa mid kacsan dadkii oo dhan waxa ay ku carareen guryaha, Magaalada waxaa lugu soo daadiyey ciidmao fara badan ayadoo cabsi laga qabo in ay ciidamadu bilaabaan howlgalo xoog leh.

Khasaaraha ayaan wali lasheegin waxa ayna sheegayaan Warar soo baxayaa in weerarkii ugu horeeyey ay ku dhaawacmeen dad gaadhaya 5 qof oo aan la garan Karin in ay yihiin Shacab & Ciidamadii Ilaalada.

Madaxwaynaha Puntlan Cadde Musse Xirsi ayaa ka hadlay qaraxyadaasi isagoo cambaarayn kulul u soo jeediyay dadkii ka danbeeyay falalkaas argagixiso. Madaxwaynuhu wuxuu tacsi u diray dadkii ku geeriyooday falkaas iyo kuwii ku dhaawacmayba.

www.ceegaag.com

webmaster@ceegaag.com