Shir Jaraa’id oo uu maanta qabtay wasiirka arrimaha gudaha ee maamulka Soomaaliland.

(Hargaysa, October 30,  2008 Ceegaag Online)

Wasiirka Arrimaha Gudaha Somaliland Cabdilaahi Ismaaciil Cali (Cirro) ayaa sheegay inay sii kordhayso khasaarihii uu keenay qaraxii shalay lala beegsaday saddex goobood oo ku yaalla Hargaysa. Wasiirku waxa uu tibaaxay in tirada dhimashadu ay hadda marayso 22 qof, halka tirada dhaawacana ay tahay 31 qof.

Wasiirka Arrimaha Gudaha ayaa waxa hareero fadhiyay wasiirro ay ka mid yihiin Wasiirada Arrimaha Dibedda Somaliland Cabdilaahi Maxamed Ducaale iyo Qorshaynta Qaranka Cali Ibraahim Maxamed (Sanyare). Mudane Cabdillaahi Cirro ayaa shirkiisa jaraai’d ka sheegay in ay hayaan caddaymo hordhac ah oo muujinaya dadkii ka danbeeyay falkaas isla markaana loo qabqabtay dad lagu tuhunsanyahay in ay lug ku leeyihiin qaraxyadii shalay ka dhacay magaalada Hargaysa

Wasiirku wuxuu ka codsaday dadka ka ganacsada gaadiidka in ay iska hubiyaan qofka ama hay’adda  ay ka iibinayaan gawaadhida, isla markaana ay si sharciyaysan ugu wareejiyaan gaadiidka cidda ay ku wareejinayaan. Isaga oo sidoo kale ugu baaqay dadka guryaha kireeya inay hubiyaan dadka ay ka kiraynayaan guryahooda isla mar ahaantaana waydiiyaan  dammiin qoraal ah oo leh saxiix.

Sidoo kale,  Wasiirka Qorshaynta Somaliland Cali Ibraahim Maxamed (Sanyare) oo isna Shirkaa Jaraa’id ka hadlay ayaa sheegay in ay maanta la shireen Ururada Caalamiga , kuwaas oo uu sheegay inay ku qanciyeen in xaaladda dalku nabaddii looga bartay ay tahay, ammaankoodana la sugi doono, isaga oo intaa raaciyay wasiirku  in ay isla maanta la shiri doonaan Hay’adaha Qaramada Midoobay.

www.ceegaag.com

webmaster@ceegaag.com