Ahmed Ould Abdallah oo digniin ujeediyay Kooxaha ka qeybgalaya Shirka Dib U heshiisiinta Jabuuti.

(Jabuuti, Sept 18,  2008 Ceegaag Online)

Wakiilka Qaramada Midoobey ee Arrimaha Soomaaliya Ahmed Ould Abdallah ayaa sheegay in wixii ka dambeeyay Maalinta Jimcaha uu si rasmi ah u dhaqan galayo Heshiiska Dowladda Federaalka Soomaaliya iyo Mucaaradkeeda.

Ahmed Ould Abdallah ayaa ugu baaqay labada dhinac inay dhaqan geliyaan heshiiska Xabad joojinta, isla markaana ay ka fogaadaan waxyaabaha burin kara heshiiskaas sida uu hadalka u dhigay, Ahmed  Ould Abdallah ayaa sheegay in aan laga ogolaan doonin kooxaha qalalaasaha ka wada Soomaaliya in ay iska sii wadaan dhibaatada, wuxuuna caddeeyay in Sabtida soo socota wixii ka bilowda la eegi doono ciddii dooneysa in ay dhibaatada Soomaaliya sii socota, isagoo Kooxaha ku lugta leh dhibataada Soomaaliyana uga digay in ay afkooda isku maxkamadeeyaan.

“Waxaan u maleynayaa xiligaas kadib cid kasta oo meel fagaare ah ka sheegata in ay dil iyo qalalaase sii wadeyso waxay isu soo bandhigi doontaa cadaaladda, waana ay dhamaatay waqtigii la xisaabtan la’aanta” ayuu yiri Wakiilka Qaramada Midoobey ee Arrimaha Soomaaliya Ahmed Ould Abdallah oo intaa ku daray in kooxaha dhibaatada ka wada Soomaaliya ay dhici karto in la hor-geeyo Maxkamadda Dembiyada Dagaalka ama Maxkamad Mustaqbalka loo sameyn doono Soomaaliya.

Hadalka Wakiilka Xoghayaha Guud ee Arrimaha Soomaaliya Ahmed Ould ayaa u muuqday mid ka kulul kuwii hore, isagoona digniintiisu ku sheegay kama dambeys ah, xilli aanay wali dhaqan gelin heshiiskii Xabad joojinta ee ay 9-kii Bishii June ku gaareen Labada Dhinac Dalka Jabuuti, hase ahaatee waxaa ka soo horjeestay Kooxaha Islaamiyiinta sida Xoogaga Al-shabaab oo dhowr jeer qaaday dagaalo ay ku jebineyso waxa ay ugu yeertay Heshiiskii been beenta Jabuuti.

www.ceegaag.com

webmaster@ceegaag.com