Dowladda Federaalka iyo Mucaaradkeeda oo ku kala dareeray Shirkii Jabuuti uga socday.

(Jabuuti Sept 21,  2008 Ceegaag Online) 

Shirkii Dalka Djibouti uga Wada socday Dowladda KMG ah iyo Isbahaysiga dib u xoreynta ayaa lagu kala tagay iyada oo aan dib dambe loo balamin ka dib markii la isku mari waayay qodobada Heshiiska Qaarkood, Labada dhinac ayaa la sheegayaa in ay isku mari la’yihiin qaabka loo dhigayo Bixitaanka Ciidamada Itoobiya ee ku sugan Gudaha Dalka Soomaaliya.

Isbahaysiga ayaa la sheegayaa in uu ku adkaystay in Ciidamada Itoobiya mudo 30 maalmood ah uga Baxaan Magaalooyinka Dalka Soomaaliya, halka Dowladda Federaalka Soomaaliya ahna ku sheegtay in laga dhigo ciidamada itoobiya ha uga baxaan Mudo 30 maalin xaafadaha ay ka deganyihiin Magaalooyinka Soomaaliya gaar ahaan Goobaha Shacabka daganyahay oo kaliya.

Ahmed Ould Abdalla ayaa isaga tagay Madasha Shirka Habeenimadii Xalay abaare 11:00 fiidnimo isaga oo u kicitimay Magaalada New York ee xarunta Qaramada Midoobay.

Sidoo kale Gudoomiyaha Isbaheysiga Sheekh Shariif iyo Shariif Xasan ayaa iyaguna caawa lagu wadaa in ay ukicitimaan Dalka Boqortooyada Sacuudiga, si ay u soo cumraystaan.

Dowlada Djibouti ayaa iyadu la sheegayaa in ay soo kala dhex gashay labada dhinaca isla markaana isku dayayso sidii uu shirku uga badbaadi lahaa Fashil ku yimaada, Dhamaan xubnaha labada dhinaca ayaa ka wada Maqan Hoolkii Shirarka iyada oo Ergada Qaramada Midoobay ee dhex dhexaadinaysa labada dhinac ay qolo waliba ugu tagayso Hotelka ay ka degantahay magaalada Jabuuti.

Si kaste ha aahatee ma muuqato xili kale oo ay labada dhinac kulmayaan iyada oo dadka qaar u arkaan shirkani in uu fashil qarka u saaranyahay haddii aan la bad-baadin Maalmaha inagu soo fool leh.

www.ceegaag.com

webmaster@ceegaag.com