Kooxaha afduubka ku haystay markabkii hubka siday oo digniino adag u jeediyay maraakibta dagaalka.

(Somalia, Sept 27,  2008 Ceegaag Online) 

Kooxaha afduubka ku haysta markab laga leeyahay dalka Ukraine oo siday shixnado hub iyo rasaas fara badan ayaa digniintii ugu ba’neyd u jeediyay maraakiiba dagaalka ee dalalka Reer galbeedku leeyihiin, kuwaas oo baacsanaya markabkaasi.

Kooxaha afduubka ku haysta markabkaasi oo la sheegay inay markabka ay ula soo dhaqaaqeen xeebaha u dhexeeya Xaradheere iyo Hobyo ayaa waxay sheegeen in haddii maraakiibta dagaalka ee shisheeyaha ay isku dayaan inay xoog ku furtaan markabkaasi ay cawaaqib xumo kala kulmi doonaan.

Kooxahan ayaa la sheegay inay shalay ilaa xalay ay qaylo dhaan iyo is urursi ka wadeen xeebaha deegaanada Hobyo iyo Xaradheere, waxaana lagu soo warramayaa inay kooxahaasi markabka ku ilaalinayaan doomanka dheereeya oo ay saaran yihiin hubka lidka diyaaradaha iyo gantaalo kala duwan, waxayna qaar ka mid ah kooxahaasi dul saaran yihiin markabka.

Khabiir u dhashay dalka Maraykanka ayaa ka digay halista ka imaan hubka saaran markabkaasi oo ay burcad badeeddu afduubteen, wuxuuna intaasi ku daray in hubkaasi laga yaabo inuu gacanta u galo koox ka mid ah kooxaha isku haya siyaasadda dalka Soomaaliya, taasoo iyadana arrin khatarteeda leh.

Dhinaca kale markab dagaal oo laga leeyahay dalka Ruushka ayaa ku soo fool leh goobaha lagu haysto markabkaasi hubka sida ee dalka Ukraine laga leeyahay isagoo isku dayaya inuu si xoog ah ku furto markabkaasi oo ay kooxaha burcad badeedda ku hareereysan yihiin.

Markabkaasi ayaa wuxuu siday shixnado hub ah oo ka kooban 33 tangi oo noocyada loo yaqaano T-72 iyo qoryaha cul-culus sida baasuukaha, Zuuga iyo dhashiikaha, waxaana hubkaasi laga soo iibiyay dalka Ruushka, waxaana markabkaasi uu ka yimid dhinaca dalalka Baltic waxaana uu ku sii jeedey magaalada Mombasa.

www.ceegaag.com

webmaster@ceegaag.com