Thabo Mbeki: Hogaamiye ku Dayasho iyo Xusid Mudan.

(S.Afrika  Sept 23,  2008 Ceegaag Online) 

Dalka SOUTH AFRICA oo leh taariikh dheer waxaa muddo dheer ka talinayeey caddaan tiro yar oo dhowr boqol oo sano ka hor soo degay, waxayna muddo dheer madaxa ka heysteen oo siyaasadda iyo dhaqaalaha ka soomiyeen dadka tirada badan ee waddanka u dhashay, waxaa dalkaas hadda ku nool dhowr iyo afartan million oo qof oo midabo badan kala leh, madowgu ha ugu badnaadee.

Malaha marka la maqlo SOUTH AFRICA waxaa qof kasta madaxiisa ku soo dhacaya NELSON MANDELA iyo AFRICAN NATIONAL CONGRESS ( ANC), waxay siyaasaddii guracneyd ee midabtakoorka (APARTHEID) soo geba-gebowday 1989kii markaas oo madaxweyne P.W.BOTHA oo uu bedelay F.W.De KLERK uu xabsiga ka soo daayey Nelson Mandela 27 sano kadib. Waxaana la qoray dastuur cusub, iyadoo 1994kii doorashooyin xisbiyo badan ay ku tartameen ay dalka ka dhaceen waxaana si weyn guuleystay xisbiga ANC, waxaana madaxweyne dalka ka noqday Nelson Mandela oo uu uga dambeeyey THABO MBEKI.

SOUTH AFRICA in kastoo saboolnimo baahsan iyo cudurka AIDSka ay fara baas ku hayaan hadana marka loo fiiriyo dhowr iyo kontonka dal ee qaaradda AFRICA waa dal hore u maray oo warshadeysan, waa dalka dahabka (GOLD) ugu badan ee dunida soo saara, iyadoo qiimaha dahabkuna uu suuqyada caalamka ka marayo halkii ugu sareysay ee uu weligii gaaro. Waxaa dhowaan jagadii maxweynennimo ee dalka iska casilay Mr: THABO MBEKI oo muddo 50 sano ah ka tirsanaa xisbiga ANC, inkastoo gudaha xisbiga uu cadaadis kaga yimid hadana wuxuu muujiyey biseyl siyaasadeed iyo waddaniyad, waxaa lagu eedeeyey in uu fara geliyey baaritaan dacwadeed (CRIMINAL INVESTIGATION) oo u dhaxeysa isaga iyo ninka la filayo in uu jagada uga dambeeyo ee JACOB ZUMA, labada nin oo uu hardan hoose uu ka dhaxeeyey.

Waxay aheyd in uu Thabo Mbeki xafiiska sii joogo inta laga gaarayo doorashada sanadka 2009ka markaas oo la filayo in uu Jacob Zuma Madaxweyne noqdo madaamaa uu madaxtinnimadii Xisbiga ANC uu mar hore kaga guuleystay Mr: Mbeki. Maalmo yar ka hor ayey aheyd markii Thabo Mbeki uu heshiisiiyey oo aad uga shaqeeyey dhibaataddii dalka ZIMBABWE, dalkaas oo dawlad xumo iyo sicir barar kan ugu sareeya dunida ay la degeen.

Runtii waa arrin ku dayasho iyo xusidba mudan sida uu THABO MBEKI isugu dhejinin xafiiska, waxaana sheekadan ay ku soo beegantay iyadoo madaxda SOOMAALIDA ee ( Dawlada iyo Mucaarad ) ay ku kala dareereen shirkii DJIBOUTI uga socday oo dadka Soomaaliyeed oo 18 sano dagaalo dhiig badani ku daatay iyo saboolnimo la kacaa ku faya wax uun rajo ah ka qabeen, mase arki doonaa hoggaamiyeyaasha SOMALIA oo u turid ay dadkooda u turayaan uga tanaasula xafiiska iyo jagada.
 
WQ: Abdi Aden Hassan (Zeylici)
yabdi69@hotmail.com

webmaster@ceegaag.com