|
Dooni ay
la socdeen Dalxiisayaal u dhashay Dalka Fransiiska oo lagu
Qafaashay Xeebaha Soomaaliya.
(Somalia, Sept
03,
2008 Ceegaag Online)
Dooni kuwa
dalxiiska ah oo laga leeyahay dalka Faransiiska ayna la
socdaan dad aan weli tiradooda la xaqiijin oo dalxiisayaal
ah ayaa laga qafaashay gacanka cadmeed taas oo sida la
sheegayo gacanta u gashay burcad-badeed Soomaliya.
Arrintan
ayaa ku soo beegantay iyadoo burcadda badaha Soomaalidu ay
gacanta ku haystaan 7 markab oo kuwa xamuulka ah.
Wafdi ka
socda maamul goboleedka Puntland ayaa degmada Eyl u tegay
maalintii shalay xaqiijinta warar isburinaya oo la xiriira
waxa uu sido markab laga leeyahay dalka Iiraan oo halkaas
lagu haysto kaasoo dadka qaarkiis ay sheegayaan inuu hub u
sido Dalka Eritrea.
Lix markab
oo kale oo iyana kuwa xamuulka ah ayaa xilligan afduub loogu
haystaa xeebta degmada Eyl, markaakiibtas laba ka mid ah
waxaa laga leeyahay dalalka Japan, laba kalana waxaa laga
leeyahay dalka Malaysia.
Laba
markab kale oo iyana laga kala leeyahay dalalka Iiraan iyo
Spain ayaa iyana ku jira gacanta burcad-badeedka, markab
kale oo aan la sheegin halka laga leeyahay ayaa isna lagu
haystaa xeebaha degmada Garacad ee gobolka Mudug, waxana
maraakiibtaas oo dhami ay u rahman yihiin madaxfurasho
lacageed.
Wafdiga ka
socda maamul goboleedka Puntland hadda booqasho hawleed ku
jooga degmada Eyl kaas oo ay hoggaaminayaan Wasiirka
macdanta ee Puntland Xasan Cismaan Alloore iyo Cali Yusuf
Cali oo ka mid ah sarkaal sare oo ka tirsan wasaaradda
arrimaha gudaha.
Waxaa kale oo wafdigaas qayb ka ah guddoomiyaha gobolka
Nugaal Cabdi Xirsi Cali iyo taliyaha qaybta booliska ee
gobolka, ujeeddada wafdiga waxaa lagu sheegay xaqiijinta
warar maalmihii la soo dhaafay uu dadku isla dhexmarayay
kuwaas oo sheegaya in markabka laga leeyahay Dalka Iran uu
Hub usido Dalka Eritrea.
Markabka Iiraan waxaa la
socda shaqaale gaaraya 30 qof oo isugu jira Iiraniyiin,
Pakistaaniyiin, dad u dhashay Ghana, Hindi iyo Bangaladesh,
kuwaas oo haatan la sheegayo dhammaantood inay badqabaan.
www.ceegaag.com
webmaster@ceegaag.com |
