Ethiopia oo sheegtay in ay Ciidamo Dheeri ah usoo direyso Somalia, kadib markii ay heshay Kaalmo Dhaqaale.

(Addis Ababa, Sept  05,  2008 Ceegaag Online)

Warar aan weli rasmi ahayn oo soo baxaya ayaa sheegaya in Dowladda Itoobiya ay ogolaatey inay ciidamo dheeraad ah oo xoojin ah u soo dirto Soomaaliya kuwaasi oo sii xoojin doona ciidamadeeda hadda dalka jooga inta ay ka imanayaan ciidamada Qaramada Midoobay. 

Wararka ayaa sheegaya in Xukuumadda Addis Ababa  ay heshey dhaqaale dheeri ah oo ay caalamka weydiisatey kadib markii ay ku hanjabtey inay ciidamadeeda kala bixi doonto Soomaaliya, Sidoo kale waxa la sheegayaa in Madaxweyne C/llaahi Yuusuf uu warqad u direy Dowladda Mareykanka uu ku sheegayo in dawladdiisu ay meesha ka baxayso haddii Itoobiyaanku dalka ka baxaan iyadoon ciidan kale badelin.

Dhinaca kale Golaha Amaanka ee Qaramada Midoobay ayaa sheegey inay ka fiirsanayaan in ciidammo nabad ilaalin ah loo soo diro Soomaaliya marka xaaladda dalku wax iska bedesho.

Qaramada Midoobay oo soo dhoweeyey heshiiskii lagu gaaray Dalka Jabuuti iyadoo ku xirtay shuruud ah in xaaladda ammaanku is bedesho marka hore. Golaha ayaa sidoo kale weydiistey Xoghayaha Guud ee QM inuu muddo 2 bilood ah ku soo gudbiyo qorshaha ciidanka nabad ilaalinta oo ay ku jiraan dalalka ay ka kala imanayaan iyo dalalka qarashka ciidamadaas bixinaya.

www.ceegaag.com

webmaster@ceegaag.com