Maamulkii Degmada Wanlaweyn oo la kala diray, kadib markii ay xalay halkaas gaareen Xoogaga Al-Shabaab.

(Wanlaweyn, Sept 06,  2008 Ceegaag Online)

Ciidamadii Booliska Maamulkii degmada Wanlaweyne ee gobolka Shabeellaha hoose ayaa la kala diray kadib markii shalay ay halkaasi gaareen ciidamada Xoogaga Al-shabaab oo ay la wareegen Maamulka Degmadaas.

Kala dirista Ciidamada Booliska Degmadaas oo 90 KM u jirta Caasimadda Soomaaliya ee Muqdisho kagana aadan dhinaca Koonfureed ayaa waxaa sidoo kale ooda ka rogeen maxaabiistii ku jirtay xabsiyada isla markaana waxa la joojiyay dhamaan goobaha canshuuraha lagu qaadi jiray ee uu maamulka daqliga ka soo gali jiray kadib marki ay halkaasi gaareen ciidamada Al-shabaab oo ay xalay halkaasi ku hoyden.

Dowladda Federaalka Soomaaliya oo iyadu magacawday Maamulkaas Degmada Wanlaweyn ayaa ilaa iyo hadda ka hadlin kala dirista Ururka Al Shabaab ay kala direen Ciidamadii Booliska degmadaas iyo Maamulkii ka talinayay.

Dadka deegaanka ayaa si weyn u soo dhaweeyay talaabada Lagu sii daayay dadka maxaabiis ahaanta ugu jiray Xabsiyada isla markaana Isbaarooyinkii la qaaday waxaana ay arintaasi ku tilmaameen mid ay in dhaweydba sugayeen.

Degmada Wanlaweyn waxay ku taala Bartamaha Wadada isku xirta Magaalooyinka Muqdisho iyo Magaalada Baydhabo oo xarun u ah Xildhibaanada Baarlamaanka Soomaaliya.

Lama oga sababata dhabta ah ee ay Xoogaga Al-Shabaab u soo galeen magaalada iyo waxa ay ka damacsan yihiin , inkastoo Afhayeen u hadlay xoogaga qabsaday Degmada Wanlaweyn uu sheegay in halkaasi aanay sii joogi doonin.

www.ceegaag.com

webmaster@ceegaag.com