Warqado digniin oo loo jeedinayo haweenka qaadka ka ganacsada oo lagu daadiyay magaalada Kismaayo

(Kismaayo, Sept 11,  2008 Ceegaag Online)

Waxaa magaalada Kismaayo gaar ahaan goobaha lagu iibiyo qaadka lagu daadiyay waraaqado digniin ah oo haweenka ka ganacsada qaadka looga digayo inay joojiyaan oo ay iska dhaafaan ka ganacsiga qaadka.

Warqadahan digniinta ah oo aanay ku xusneyn cidda ama kooxda soo qortay ayaa sidoo kale loogu hanjabay haweenkaasi in tallaabo laga qaadi doono haddii ay ka dhago fadeegaan digniinta loo soo jeediyay, waxayna taasi jahwareer ku abuurtay haweenka ka ganacsada qaadka ee magaalada Kismaayo.

Qaar ka mid ah haweenkaasi ayaa waxay qoraal ashtako ah u gudbiyeen maamulka Islaamiga ah ee magaalada kismaayo, waxayna madaxda maamulkaasi sheegeen inaanay iyaga haba yaraatee waxba kala socon warqadahaasi digniinta ah, ayna tahay mid lagu carqaladeynayo ammaanka magaalada Kismaayo.

Afhayeenka maamulka Islaamiga ah ee magaalada Kismaayo Sheekh Xasan Yacquub ayaa sheegay in haatan maamulka cusub ee magaalada Kismaayo aysan qorshaha ugu jirin inay mamnuucaan ka ganacsiga iyo cunidda qaadka, wuxuuna intaasi ku daray in waraaqahaasi digniinta ah ay daadiyeen kooxo uu sheegay inay doonayaan inay iska hor keenaan maamulka magaalada Kismaayo iyo Shacabka ku dhaqan.

Bishii August Dhamaadkeeda ayay ahayd markii diyaarad sidday qaad oo kasoo dagtay garoonka Diyaaradaha ee magaalada Kismaayo ay rasaaseeyeen qaar ka mid ah xoogagga Islaamiyiinta ah ee la wareegay magaalada Kismaayo, taas oo uu dhaawac ka soo gaartay diyaaradda, inkastoo markii dambe ay raali gelin ka bixiyeen saraakiisha hoggaaminaysay xoogagga la wareegay magaalada Kismaayo.

www.ceegaag.com

webmaster@ceegaag.com