Weeraro gaadmo ah oo xalay ka kala dhacay Magaalooyinka Muqdisho iyo Baydhabo.

(Baydhabo, Sept 07,  2008 Ceegaag Online)

Kooxaha ka soo horjeeda joogitaanka Ciidamada Itoobiya ee Gudaha Dalka Soomaaliya iyo Siyaasadda Dowladda KMG ah ayaa xalay Weerar loo adeegsaday Bambooyin waxay ku qaadeen Saldhig Boolis oo ku yaala Xaafadda Suuqa Xoolaha ee Magaalada Baydhabo.

Taliyaha Saldhiga Ciidamada Booliiska ee uu xalay dagaalka ka dhacay Captain Aadan Cali Aadan ayaa sheegay in dagaalkaasi uusan ka soo gaarin wax khasaare ah.

Magaalada Baydhabo ayaa waxay xarun u tahay Baarlamaanka Soomaaliya, waana Magaalo inta badan aysan ka dhici jirin dagaalada  fool ka foolka ah ee u dhaxeeyay Ciidamada Itoobiya oo kaashanaya kuwa Dowladda Federaalka iyo Xoogaga ka soo horjeeda.

Dhinaca kale Weeraro gaadmo ah ayaa xalay lagu qaaday Ciidamada Nabad Ilaalinta AMISOM, kuwaasoo oo saldhig ciidan ku leh Isgoyska KM4, weerarkan  oo bilowday 3-da Habeenimo xilli dadka ku dhaqan Magaalada Muqdisho ay  sugayeen Saxuurta ayaa ahaa mid si weyn looga maqlayay Guud ahaan Magaalada, iyadoo Labada dhinac ay adeegsadeen Hubka cul culus.

Weerarkan gaadmada ahaa ee xalay lagu qaaday Ciidamada AMISOM ayaa waxaa sheegtay Xoogaga Al-shabaab oo horay Afhayeenkooda Sheekh Mukhtaar Roobow Abuu mansuur uu ugu baaqay inay socon doonaan Weeraro Xiriir ah inta lagu guda jiro Bisha Barakeysan ee Ramadaan.

www.ceegaag.com

webmaster@ceegaag.com