Akhristow, waxa laga yaabaa in aad isweydiiso Dowlad Goboleedka Puntland xildhibaano miyey leedahay? Jawaabtu waa haa, laakiin maxaa qoraalkan loo qoray? Qoraalkan waxa loo qoray isbedel ku yimid taariikh soo taxnaan jirtey oo ay lahaayeen beelo badan oo degan, degaamada SOOL, SANAAG, KISMAAYO iyo CAYN,oo ahayd in aysan soo hormarin dumarka, laakiin hada larabo in la bilaabo.

Beeshan kor ku qoran oo degan degaamada SOOL, SANAAG, KISMAAYO iyo CAYN, ayaa waxa ay ku wada hadleen teleconference qaatay mudo badan in looga doodo xubin-nimada Puntland baarlamaankeeda cidii uga qayb qaadan lahayd, maadaama la kala dirayo baarlamaanka Puntland maalmahan nagu soo fooda leh, waa hadii la raaco sida tastuurku dhigayo.

Dadkii ka soo qayb galay telconferensigaa ayaa waxa ay soo bandhigeen in aan laga maarmeen in markan xubin-nimada la siiyo haweenka, maadaama ay in badan raga soo hayeen, la arkayna waxqabadkoodii in uu dhaafi waayay “ka dhex hadlid baarlamaanka dhexdiisa uun, laakiin  aan waxba ficil ahaan loo qabanin”.  Sidaa daraadeed waxa la go’aansaday in markan laga soo xulo qurbajoogta gabadha ugu firfircoon oo xilkan ka bixi karta, waxayna noqotay Kobra Keyse Xaaji Jaamac. Haddaba akhristow, Kobra waa qofma?

Kobra, waxa ay ku dhalatay magaalada Kismaayo waxayna ku dhamaysatay dugsii hoose iyo sare, waxayna u soo baxday qurbaha si ay wax uga barato. Kobra oo tacliinteedi sare ku dhamaysatay Maraykanka, kadibna heshay shaqo aad u fiican oo ay ka gaartay ilaa heer Manager ah. Dhinaca ganacsiga ayaa Kobra waxa ay ka gaartay heer sare, waxayna abaal marino kala duwan ka heshay shirkado badan oo gudoonsiiyey bilado. Kobra, ayaa hadda waxa ay degan tahay oo ay guryo ku leedahaya gobolka Ohio, magaalada Columbus. Intii ay joogtay qurbaha Kobra waxa ay wax tartay dadkii ka soo barakacay dagaaladii sokeeye ee u qaxay Buuhoodle, waxayna marwalba u doodi jirtay xuquuqda dumarka iyo caruurta yaryar oo ay ku tilmaami jirtey in ay yihiin dadka iyagu marwalba dhibtu taabato. Ugudambeytii, Kobra, waxay ka qayb qaadatay abaarihii ugu dambeeyey ee ka dhacay wadanka gudihiisa sanadkan oo ay u dirtey macaawino isugu jirtey biyo iyo raashiin.

Haddaba hadaanu nahay qurba joogta degan wadanka dibadiisa ee u dhalatay beeshan, waxa aanu ka codsnayeynaa Odyaasha, Waxgaradka, Siyaasiyiinta, Culimada, Macalimiinta, Haweenka, iyo Dhalinyarada in ay garab istaagaan gabadhan Aqoonyahanada ah ee tolkeeda jooga qurbajoogta u garteen in ay u matasho xubin-nimada baarlamaanka Puntland. Gabadhaas oo kulankeedii ugu horeeyey uu ka dhici doono gobalka Minnesota, ka dib markii ay casuumad ka heshey aqoonyahano ka soo jeeda beesheeda.

Somali Media
Abdimalik Askar
aabdimalik@hotmail.com