Waxaa Xaflad si heer
sare ah loo soo agaasimay, oo ay soo qaban-qaabisay
Jaaliyadda Soomaaliyeed ee ku dhaqan dalka Isutagga
Imaaraadka Carabta , oo loogu muujiyay taageero weyn
oo hiil iyo hooba leh ummadda Soomaaliyeed doorashadii
Madaxweyne Mudane Sheikh Shariif Sheikh Axmed iyo
dhismaha golahiisa Wasiirada, madaxne uu ka yahay
Ra'iisul Wasaare Cumar Cabdirashiid Cali Sharmaarke,
ayaa xalay oo Jumcaha ahayd kuna beegnayd 20/03/2009 ,
lagu qabtay Hoteelka caanka ah ee Hilton - Abu Dhabi .
Tirada dadweynaha ka soo qaybgashay kulanka oo kor u
dhaaftay ilaa shan boqol oo qof waxaa erayo guubaabin
iyo tusaaleyn ah ka soo jeediyay madax sare oo ka
socotay guddiga jaaliyadda iyo Safaaradda dalka
Soomaaliya uga furan magaalada Caasimada u ah
Imaaraadka ee Abu Dhabi.
Ugu horreyn waxaa xafladda lagu bilaabay heesaha
qaranka ee labada dal ee Soomaaliya iyo Imaaraadka,
kadibna waxaa laga aqriyay aayado Qur'aanka Kariimka
ah oo uu dabajoogay wacdi Diini , soona jeediyay
Sheikh Cumar Cali Maxamed (Cumar Shiino).
Waxaa iyana markaas kadib erayo kooban oo lagu ayidayo hoggaanka
cusub ee qaranka , dhismaha Dawladda iyo waliba hawsha
nabadeynta dalka halkaas ka soo jeediyay Guddoomiyaha
Jaaliyadda Maxamed Cabdi Nuur, Safiirka Soomaaliya u
jooga Imaaraadka Axmed Maxamed Cigaal iyo Drs. Khadra
Bashiir oo ku hadashay magaca haweenka Soomaaliyeed .
Intaa kadib waxa barnaamijka lagu soo dhaweeyey
Mustafa Akhyaar oo ka mid ah Gudiga jaaliyadda Somaliyeed
Isagoo halkaas ka soo jeediyey Gabay Carabiya oo ka
hadlaya xaaladda wadanka somalia, waxaa sidoo kale ka
qayb qaatey barnaamijka dhalinyaro aad u fara badan oo
qiiraysan kuwaas oo qaadaya erayo ay ku maamuusayaan
dawladoodda cusub ee somalia.
Madaxdii munaasabadan goob-joogga ka ahayd waxay kala
ahaayeen Danjiraha Soomaaliya Axmed M. Cigaal,
Danjiraha Jamhuuriyadda Jabuuti Mudane Idiriis Axmed
Shirwac, Ex-Danjire Cabdi-Nuur Cali Yuusuf, Ex-Danjire
Cabdirahmaan Cusmaan Cumar, Qunsulka Safaaradda
Soomaaliyeed Xuseen Maxamuud Maxamed, Guddoomiyaha
Jaaliyadda Maxamed Cabdi Nuur , Ex-General Maxamed
Adan (Dhega-Cadde),Am. Cali Qaasim iyo madax kaloo aad
u tira badan , oo aan halkaan lagu soo koobi karin .
