|
Jaamacadda Hargeysa oo lagu
Kordhiyay Dhisme cusub oo lagu Baranayo Xalinta Khilaafaadka.
(Hargaysa, Nov
03,
2009 Ceegaag Online)
Agaasimaha Wasaaradda
waxbarashada,
Somaliland Cali Cabdi Odowaa ayaa dhagax
dhigay dhisme cusub oo lagu kordhinayo jaamacada
Hargeysa. Dhismaha cusub ayaa noqon doona xarunta xalinta
khilaafaadka.Munaasibadii dhagax dhiga oo ay ka soo qayb
galeen madaxda jaamacada Hargeysa, masuuliyiin ka socday
hay’ada UNDP oo iyadu bixisay kharashka dhismaha, iyo xubno
ka socday xukuumadda Somaliland ayaa ugu horeyn waxa
halkaasi ka hadlay, guddoomiye ku xigeenka jaamacada
Hargeysa, Mubaarig Ibraahin Aar oo sheegay in dhismahan
cusub uu faa’iido badan u yeelan doono mandaqada geeska
Afrika iyo Somaliland-ba, waxana hadaladii Mubaarig ka mid
ahaa ".
  
Maanta waxaynu dhagax dhigaynaa
dhisme cusub oo jaamacada Hargeysa lagu kordhiyay oo ay
kharashkiisa bixinayso hay’ada UNDP, waxa uu center-kani
xalin doonaa khilaafaadka ka dhaca Somaliland iyo weliba
guud ahaan Somalia, khilaafaadka ayaa si cilmiyeysan loo
xalin doonaa isla markaana waxa uu noqon doonaa goob lagaga
hor tago khilaafaadka, waxa dadka loo tababari doonaa
xalinta khilaafaadka iyadoo siminaaro loo qaban doono, waa
meel runtii uu maanta dalku u baahnaa, run ahaantii waxay
jaamacada Hargeysa hormood u noqon doontaa wax kasta oo
cilmiga kor u qaadaya, waxan hambalyaynayaa hay’ada UNDP,
waxan rajaynayaa in dhismahani si deg dega u dhamaado,waxa
uu dhismahani yeelan doonaa shaqaale si wanaagsan loo
tababaray".
Agaasimaha guud ee wasaarada
waxbarashada, Cali Cabdi Odowaa ayaa isaguna halkaa ka
hadlay waxana hadaladiisii ka mid ahaa " runtii dhismahani
faa’iido badan buu u yeelan doonaa Somaliland, ilaahay
khilaaf inaguma keeno laakiin koleyba haddii khilaafaadba
yimaadaan inuu noqdo center-kani meeshii khilaafaadka lagu
xalin lahaa, haddii uu hore u jiri lahaa center-kani waxa uu
qayb libaax ka qaadan lahaa xalinta khilaafaadka, waa wax
wanaagsan in xaruntan la sameeyo, waxan ilaahay ka baryayaa
in xaruntani noqoto mid dalkeena wax u tara".
Intaa kaddib waxa isaguna halkaa ka
hadlay xidhiidhiyaha hawlaha bani’aadamnimada iyo dib u
dejinta, hay’ada UNDP, Mark Bowden, waxana hadaladiisa ka
mid ahaa " waxan aad ugu faraxsanahay in aan ka soo qayb
galo munaasibadan lagu dhagax dhigayo dhismaha cusub ee
xarunta xalinta khilaafaadka, waa mid ka mid ah hawlaha ay
UNDP ka qabato Somaliland inay ka qayb qaadato wax kasta oo
lagu xalinayo khilaafaadka, mashruuca lagu dhisayo xarunta
cusub waxa iyaguna maal gelintiisa ka qayb qaatay dalal ay
ka mid yihiin Sweden, Norway iyo Ingiriiska iyo weliba
ururada bulshada. Xaruntani waxay noqon doontaa mid si
cilmiyeysan u xalin doonta khilaafka iyo weliba dambiyada
dhaca, waxaynu ku nool nahay wakhti ay wax waliba is
bedeleen oo dambiyada iyo khilaafaadku bateen, intii aan
imanayay Somaliland waxyaabihii aan ogaaday waxa ka mid ahaa
inay bateen dambiyada ay geystaan ciyaala suuqa oo uu
kufsigu ka mid yahay.
Markaa arrimahaas oo dhan ayay
xaruntani u noqon doontaa mid ku xalisa hab cilmiyeysan.
waxa jira khilaafyo badan, maaha xukuumadaha oo keli ah ee
qoysaska laftooda ayaa mararka qaar u baahan in la xaliyo
khilaafka soo kala dhex gala. Waxan hubaa in Somaliland ay
hormuud ka noqon doonto xalinta khilaafka oo ay kaga
horeyn doonto dalal badan oo geeska Afrika ku yaala.
Markaa waxan ugu dambeyntii hambalyo u dirayaa cid kasta
oo ka qayb qaadatay hirgelinta mashruuca lagu dhisayo
xaruntan".
www.ceegaag.com
webmaster@ceegaag.com |
