|
Golaha Guurtida M/Sland oo
Maalintii Labaad ka doodaya Muddo Kordhinta Madaxweyne
Riyaale iyo K/xigeenkiisa.
(Hargaysa,
September 25, 2009 Ceegaag Online)
Golaha Guurtida Maamulka
Somaliland ayaa Maalintii Labaad fadhi ka yeeshay
Xaaladaha Ka taagaan Somaliland gaar ahaan sidii Ay Guurtidu
uga Doodi lahaayen Muddo kordhin kale oo loo sameeyo
Madaxweyne Riyaale iyo Ku xigeenkiisa Axmed Yuusuf Yaasiin
oo ay si adag iminka uga soo horjeedaan Xisbiyadda
Mucaaradka Somaliland ee KULMIYE & UCID.
Gudoomiyaha Golaha Guurtida Somaliland Saleebaan Maxamuud
Aadan Gaal ayaa Hadalka u furay Golaha Guurtida maanta
wuxuuna yiri "Maalintii sabtida Golaha waxa ka jiray buuq,
sawaxan iyo qas, markaa waxaan jecelahay intaynaan hawlo
qaran u gudbin inagu sidii aynu xilkeena u gudan lahayn (Guurti
ahaan), aynu meel isla dhigno, hadii inaga (Guurtida) uu
golaheenu noqdo fawdo cidna uma talin karno.Waynu og-nahay
oo wax badan ayaa jira, waxaynu la soconaa in khilaaf jiro,
khilaafkaas innaga Guurti ahaan waa ina saameeyay ee ha
qarsanina, waynu midownay oo Axsaabta aynu dhex u ahaano
ayaynu go’aan ku gaadhnay, oo tiraba laba jeer bil gudaheed
ku gaadhnay, waxaad moodaa in aanay waxba inaga tarin, bal
haddaba waxaan leeyahay dhaqanka waajibkii xilka Umadda
inaga saarnaa aan ku gudano oo inaga Guurti ahaan aynu isla
helno talaabada."
Saleebaan Gaal wuxuu Golaha sidoo kale uga Warbixiyay
Wakhtiga iyo Mudo kordhinta wuxuuna yiri " Arintaa qudha ee
Goluhu u furnaa ee kalfadhiga aan caadi ahayn u qaadanay waa
muddada xilka Daahir Riyaale iyo Ku-xigeenkiisa oo ah 27-ka
September, arintaa iyada ah hadii waajibka aynu ku leenahay
aynu ka gudan wayno qaskaa Golaha ka dhacaaya ayaa qarankana
ka dhacaaya, taasina waa waajib inaga saaran in aanay dhicin
dhawr jeer oo horena waan sheegay oo Axsaabtu wax ha ku
heshiiso, laakiin waajibkaasi waa mid Dastuuri ah.Arintaa
iyada ah oo mudadu tahay 27-ka ilaa barito waxa ka hadhay
afar cisho oo kaliya, waxaynu gudo gelaynaa barito oo
bilaabmayaa, waana in ay ku dhammaato inta ka horaysa 27-ka
September."
Si kastaba ha ahaate Fadhigi ay Maanta yeesheen Golaha
Guurtida Somaliland ayaa lagu kala kacay Maadaama aanu
wakhtigu u saamixin inay Dooda soo afjaraan Isla maanta
waxaana lagu Balamay in Maalinimada Berrito ah Dib la isugu
soo laabto Waxaana Goobta sidoo kale ka hadlay Masuuliyiin
kale oo ka tirsan Golaha sida G/ku xigeenka Guurtida Sheekh
Axmed Sh.Nuux Fure.
Ceegaag Online
webmaster@ceegaag.com |
