Xuskii 20 guuradii Maalinta Horumarinta Adduunka (International Development Day) oo lagu qabtay Magaalda Edmonton ee Gobolka Albera ee Canada.

  (Edmonton,  February  11,  2010 Ceegaag Online)

Xaflad si heer sare ah loo soo agaasimay oo ay ka soo qayb galeen masuuliyiin sarsare oo kakala socda dawladda Alberta sida Wasiirka waxbarashada David Hancock ku xigeenka afhayeenka baarlamaanka Alberta Wayne Cao, madaxda  laamaha kala duwan ee arrimaha bulshada, ururada caalamiga ah, khubararo ku xeeldheer arrimaha horumarinta iyo gargaarka biniaadmiga iyo dadwayne farabadan ayaa lagu qabtay xarunta golaha degaanka (City Hall) ee magaalada Edmonton.

Xafladdaas oo lagu soo bandhigay wax qabadka urururada  ka shaqeeya horumarinta iyo daryeelka dunida saddexaad iyo gudaha Canadaba, waxaa  soo qabanqaabiyay  guddiga Golaha iskaashiga caalamiga ee Alberta (Alberta Council for Global Cooperation - ACGC) kaas oo ay ku kulmaan in ka badan 70 urur caalami oo fadhigoodu yahay dalka Canada.

Ugu horrayn waxaa xafladdas furay Heather Macpherson ah aha madaxa ururka ACGC iyadoo xustay muhimadda wayn ee ay maalintani u leedahay guud ahaan adduunka gaar ahaanna ururada ku hawllan horumarinta iyo daryeelka dunida soo koraysa iyo kuwa horumarayba. Waxay Heather hadalka ku soo dhawaysy wasiirka waxbarasha ee gobolka Alberta David Hancock oo isaguna halkaas ka jeediyay hadal soo jiitay dhagaha martisharafta isagoo ku ammaanay ururada ku hawllan arrimaha horumarinta wax qabadka muuqda ee ay ka sameeyeen caalamka iyo gudaha Canadaba.

Intii xaladdu socotay waxaa la guddoonsiiyay abaalmarinno 9 urur oo loo aqoonsaday sanadkan  in ay yihiin kuwii ugu waxqabadka fiicnaa ee ka hawl galay gudaha Canada iyo caalamkaba. Ururradaas abaalmarinta helay  ayaa waxa ka mid ahaa ururka waxbarashada iyo horumarinta reer miyiga ee SCERDO oo lagu ammaanay  hoggaaminta, barbaariinta iyo toosinta dhallinyarada Soomaaliyeed ee ku nool magaalada Edmonton iyo dalka Soomaaliyaba.

Waxaa abaal marintaas la guddoonsiiyay Amaal Cabdi Ciise oo ah madaxa mashruuca “Kac oo Hoggaami” (Stand Up and Lead ) oo ay fuliso hay’adda SCERDO. Amaal oo ah gabadh Soomaaliyeed oo da’yar ayaa ku mutaysatay abaalmarintaas ay u soo jiidday guud ahaan ummadda Soomaaliyeed gaar ahaan bulshada ku dhaqan gobolka Alberta karti iyo dadaal dheeraad ah iyadoo ka mid noqotay 9ka qof ee gobolka Alberta ugu waxqabadka badnaa sanadkii 2009, marka laga eego xagga hoggaaminta, kartida, aqoonta iyo gargaarka aadamiga.

Gabagabii xafladda ka dib ayaa wasiirka waxbarashada David Hancock kulan gaar ah oo gaaban la yeeshay ururka SCERDO iyo taageerayaashiisa isagoo ku ammaanay waxqabadka ay u hayaan dadkooda iyo dalkooda (Somalia-Canada), wuxuuna u ballanqaaday wasiirku in uu ururka SCERDO wax la qaban doono xilliyada soo socda. Waxaa isna wasiirka warbixin kooban ka siiyay waxqabadka ururka guddoomiyaha guddiga fulinta ee SCERDO Bashir Xaaji Cali (Jamaal) kana mid ah Guddiga Golaha Iskaashiga Caalamiga ah ee Alberta (ACGC) isagoo isla markaana uga mahadceliayay wasiirka sida uu u danaynayo daryeelka bulshada Soomaaliyeed ee ku dhaqan magaalada Edmonton gaar ahaan dhinaca waxbarashada iyo barbaariinta dhallinta soo koraysa.  Xaflada ayaa jawi wanaagsan kusoo gabagabooday.

Daawo Sawiradda

Source: Scerdo.org

webmaster@ceegaag.com