|
Wakaalada Badbaadada Qaranka
Mareekanka (NSA) oo basaasta adeegsadayaasha Windows7!!!
(Imaaraadka,
January 05, 2010 Ceegaag Online)
Mahad iyo amaan Allaah ayaa
mudan oo iska leh, Rabiga Caalamiinka, amaan iyo nabad
gelyona ha ahaato korkiisa kii aanu jirin Nebi ka dambeeyaa
iyo Ahalkiisii iyo Asxaabtiisii dhamaan.
Intaas ka
dib:
Labaatankii
sano ee aynu soo dhaafnay, waxa horumar baaxad wayn leh laga
gaadhay xaga isgaadhsiinta, taas oo ay suura gelisay
burburkii ku yimid midowgii Soofiyeetka(Soviet Union) iyo
gaashaan buurtii Warsaw oo meesha ka baxday, halkaas oo uu
ku soo afjarmay wixii loo yiqiinay dagaalkii qaboobaa ee u
dhexeeyay labada gaashaan buureed ee Nato iyo Warsaw, taas
oo keentay in Mareekanku u soo bandhigay aduunka adeegsiga
Internet ka, iyada oo ay markii hore mudo dheer Adeegsigeedu
ku koobnaa uun ciidamada Mareekanka, tani waxay albaabada u
furtay horumar baaxad wayn oo laga gaadho xaga isgaadhsiinta.
waxaa
bilaabantay in dayax gacmeedyo hagaaya isgaadhsiinta hawada
sare loo diro oo ay leeyihiin Ururo, wadamo iyo xataa
shirkado gaar loo leeyahay, iyo in la sameeyo keebulo
(cables) Internet tayo leh isaga gudbiya qaarad ilaa qaarad,
waxa kaloo bilaabmay tartan dhex mara shirkadaha sameeya
Combuutarada iyo barnaamijyadooda kala duwan iyo xataa kuwa
samaya
Tilifoonada,
hadaba horumarkan baaxada leh ee laga gaadhay farsamada
macluumaadka(information technology), waa arin aan inteen
badan oo maanta adeegsanaysaa aanay marna ku ri’yoon in
horumar noocan oo kale ah la gaadhi doono, oo aduunka oo
dhami noqonaayo sidii tuula yar oo daqiiqado yar afarteeda
dacal laysaga gudbaayo, maanta wax kasta oo macluumaad ah oo
aad u baahatid waxaad ku ogaanaysaa ama ku helaysaa
daqiiqada yar gudahood, waqtiyo aad u dhowaa warqada aad is
tidhaahdo Cid u dir waxay qaadan jirtay todobaadyo ama bilo
inay ku gaadho halkii aad u diraysay, maantana waxaad
adeegsanaysaa E-mail ku gaadha ilbidhiqsiyo yar meel kasta
oo aad doontid aduunka dacaladiisa, bal maanta waxaa kuu
suura gashay adoo hoos fadhiya gurigaagii jiingada ahaa,
inaad la soo sheekaysato ahalkaaga iyo asxaabtaada ku kala
sugan aduunka dacaladiisa adoon wax lacag ah oo la taaban
karo bixin iyo inaad si fudud u hesho macluumad kasta oo aad
u baahatid iyo wax badan oo Aynaan qoraalkan ku soo koobi
karayn.
hase yeeshee
nimcadaa balaadhan ee uu Allaah tacaalaa inoo fududayay kama
madhna nuqsaan iyo shar aynu inagu gacmaheena ku kasbanay,
tusaale ahaan markuu noqday maanta Combuutarku wax aasaasi u
ah nolosha qofka iyo maslaxad kasta nooca ay doonto ha
noqotee, Internetkuna aduunkii oo dhan isku soo dhoweeyay oo
ay u noqotay saaxad ay ku kulmaan, ayaa waxa batay weeraro
ah arbushaad, diiqadayn iyo dhibaatayn qofka kaga imanaaya
dhinacya kale
Oo aanu isagu
markaa garanayn qarkood, dhinacyada kale se waxay noqon
karaan kuwa aan iyana garanayn laakiin se u soo raacay
barnaamijyo uu adeegsanaayo, kuwa garanaaya oo toos u wax
yeelaynaya oo ay wax yeelaynta iyo dhibaatayntu ay u tahay
balwad. Weeraradaasu way noocya badan yihiin sida in E-mailo
xayaysiis ah oo aad u tira badan laguu soo diro, in lagu
basaaso oo lagu dhegaysto macluumadka Combuutarka kuugu
jirana lagaa xado, in Virus yo laguu
Soo diro
lagaaga kharibaayo Combuutarka iwm, shirkadaha waawayn ee
nadaamka ka shaqaysiinta (operation system) sameeya iyo kuwa
barnaamijyada kala duwan ee lagaga hortago kharibaada
Combuutarka sameeyaa aad bay ugu dedaaleen in ay arimahaa ka
hortagaan, hase yeeshee markay arin ku guulaystaanba mid
kale oo hor leh baa soo baxda, sida muuqata suuqanu waa mid
aan lagu kala adkaanayn sida dhibaatada dalkeena ka taagan,
shirkadaha nadaamka ka shaqaysiinta sameeya iyo Kuwa
barnaamijyada kala duwan ee loo adeegsado Combuutarka
sameeya laftoodu kama madhna mararka qaar dhibaataynta
adeegsadayaasha nadaamkooda iyo barnaamijyadooda, ka sokow
maalka faraha badan ee ay kaga iibiyaan dadka nadaamadooda
iyo barnaamijyadooda, waxay ku dhex samayaan barnaamijiyo
xayaysiis ah iyo kuwa ay ku ilaalinayaan mulkiyada oo dadka
arbusha iyo xataa kuwa ay adeegsadayaasha ku basaasaanba,
tusaale waxaa inoogu filan fadeexadii ay kala kulantay
Shirkada wayn ee aadka loo yaqaano ee Google daalaciyeheeda
(browser) la yidhaahdo Google Chrome, kaas oo la ogaaday
muda yar ka dib markuu soo baxay in ay shirkadu ku basaasto
adeegsadayaasha, oo ay dhamaan macluumaadka ugu jira qofkaa
Combuutarka lagu kaydiyo archives ka shirkadaa, Google hada
waxay soo saaraysaa nadaam ka shaqaysiinta ah oo u gaar ah,
hase yeeshee in kasta oo loo baahnaa shirkad tartan kula
gasha Microsoft suuqaan ay sida xaaraanta ku haysato, ayaan
hadana aad loogu farxin in ay shirkadaasu noqoto Google, ka
dib markay ku fadeexadowday daalaciyeheedii Google Chrome.
Wakaalada badbaadada qaranka mareekanka (NSA)
oo basaasta adeegsadayaasha Windows7!!!
Maanta waxaa
soo baxday fadeexad kale oo aad u wayn, yay se ku dhacday
fadeexadanu?!!! Waxay ku dhacday shirkada wayn ee aan ilaa
hada cidina uga awood badnayn suuqaan nadaamada ka
shaqaysiinta, waa shirkada aadka u wayn ee Microsoft ee soo
saarta nadaamada ka shaqaysiinta ee loo yaqaano Windows iyo
barnaamijyo kale oo badan oo la xidhiidha Combuutarada, Sida
ku xusan cinwaanka qoraalkan waxaa soo shaac baxday
dhowaanahan, inWakaalada badbaadada
Qaranka ee
Mareekanka (NSA) ay basaasto adeegsadayaasha nadaamka cusub
ee Windows 7, nadaamkan oo ah kan hada cusub ee ay soo
saartay shirkada Microsoft, nadaamkan oo ahaa mid ay
adeegsadayaasha Windows ku aad ugu faraxsanaayeen, iyada oo
ay shirkadu ku guulaystay in ay ku xaliso nadaamkan ceebo
badan oo ay lahaayeen nadaamadii ka horeeyay, gaar ahaan ka
dib markii ay kala kulantay shirkadu guuldaro baaxad wayn
nadaamkii kan ka horeeyay ee Windows Vista.
Hadaba waxa
la ogaaday in Wakaalada badbaadada qaranka Mareekanka (NSA)
ay basaasto adeegsadayaasha nadaamka cusub ee Windows 7,
sidaas waxa ka hor qirtay kongreeska (congress) Mareekanka
mid ka mid ah masuuliinta waawayn ee Wakaalada badbaadada
qaranka Mareenka (NSA), in ay wakaaladu kala qayb qaadatay
Microsoft samaynta nadaamka ka shaqaysiinta cusub ee Windows
7!!! Mowduucanu waa mid aad loo og yahay, laguna sheegay
wargaysyada aduunka ugu waawayn iyo Tilifsiyoonadaba, mana
aha kan arintan dabada ka riixaya oo dhaqaajiyay aniga iyo
adiga toona ama masuul ama aqoonyahan ka mid ah aduunka
Islaamka, ee bal waxaa dabada ka riixay oo dhaqaajiyay
shirkadaha waawayn ee Mareekanka, iyagoo ka baqaaya in la
basaaso, yacni u baqaaya maslaxadahooda in la basaaso,
hadaba sheekadanu iyada oo kooban waxay tahay:
in Wakaalada
Badbaadada Qaranka Mareekanku(NSA) ay cadaadis ku saartay
shirkada Microsoft in ay samayso waxa lagu magcaabo “Albaaba
dambe” “Back doors” waana tacliimaat barnaamijsan oo iyaga u
gaar ah, waa Wakaalada badbaadada Qaranka Mareekanka ee, oo
ay ku beerto nadaamka laftiisa, kuwaas oo iyagu waa
barnaamijyadaas ee, u suura gelinaaya Wakaaladu in ay daba
gasho oo dhegaysto dhaqdhaqaaqoodana ilaaliso
adeegsadayaasha nadaamkan Windows 7, waana tan qaar
sheekooyinka laga yidhi arintan: tan kowaad waxay tahay in
ay Microsoft la gaabisay ka saarista qaar qalabkaa nadaamkan
ka shaqaysiinta Ee cusub, ka dib bil markii la soo saaray
koobiga (copy) cusub oo ah nadaamkan Cusub!!! Taas oo
macnaheedu yahay in barnaamijyada la sheegay ay dhab ahaan
ku jireen nadaamka!!! In se laga saaray iyo in kale Allaah
tacaalaa uun baa og.
Sheekada
labaadna waxay ka hadlaysaa oo sheegaysaa in Wakaalada
badbaada qaranka Mareekanka (NSA) ay cadaadis ku saartay
Microsoft iyo shirkado kaleba in ay ku dhex beeraan
barnaamijyada Wakaalada nadaamkooda iyo barnaamijyadooda.
Waxaa qaarkiin Odhan karaan oo maxaan haystaa oo ay iga
basaasaysaa Wakaalada badbaadada qaranka Mareekanku, waana
loo dhigi karaa sidaa markaynu ka hadlaynu adeegsadaha
caadiga ah, hase yeeshee arintanu waa mid dadka lagu
dulaysanaayo, waxayna ka mid noqonaysaa xad gudubyada ugu
waawayn ee Bini Aadamka lagula kaco, Diinteena suuban iyo
dhamaan Miladaha kale ee aduunka ka jira, akhlaaqda
wanaagsan iyo sharciyada aduunka ka jiraba dhamaan way ka
soo horjeedaan basaasida noocan ah,
Marka laga
soo tago adeegsadaha caadiga ah, waxaan shaki ku jirin in ay
basaasidani ku dhacayso dowladeheena Islaamka iyo
shirkadaheena waawayn ee islaamka meel kasta aduunka ha ka
joogaan ee. Marka waxa is waydiin mudan, ma imanaysaa maalin
uu jiraayo nadaam ka shaqaysiineed oo Muslim ah 100% oo ay
weliba jirayaan barnaamijyo Muslim ah oo ay sameeyeen gacmo
Muslim ah, oo aanay suura gal ahayn in ay Wakaalada
badbaadada qaranka Mareekanku soo dhex gasho iyo Wakaalada
sirdoonka Tooni, taas ayaan Allaah tacaalaa ka rajaynaynaa
inuu inoo fududayo, waayo uma aynu negin caqli, cilmi iyo
xoola toona, bal waxaynu dheernahay iyaga iimaankeena aan
yaqiinsanahay Rabiga caalamiinka. Waxa kale oo iyana meesha
imanaysa su’aasha ah, mar hadaynu ku suganahay khatarta ah
in ay asraarteenu ku dhacdo gacanta cadawgeena, inana aynaan
maanta lahayn nadaam ka shaqaysiinta ah oo inoo gaar ah, ma
jiraa nadaam kale oo aan ahayn kuwaa cadawgeenu adeegsado?
Linux waa
nadaamka kaa maaran siin kara Windows iyo Macintosh ba
Jawaabtu waa
haa, waxaa jira nadaamka ka shaqaysiinta ee loo yaqaano
Linux, Linux waa nadaam caan ah oo sumcad wayn leh, waa
nadaam aanay ku filayn in weedho socota ah laga yidhaahdo
sifadiisa, waa nadaam u soo kordhiyay bani Aadamka wax badan,
Waxa jira dad badan oo aan kari karin in ay iibsadaan
nadaamada cusub ama ay cusboonaysiiyaan qalabkooda, kuwaas
oo ku khasban in ay hadana ku jiraan gacanta shirkadahan
sida xaaraanta ah ku xirtay suuqan, ee aynaan kari karin in
aan diidno Amaradooda iyo dalabaadkoodaba, ulama jeedo
hadalkayga in badan oo ina ka mid ah oo laba yaaban
hadalkayga, waayo maba iibsadaan nadaamada asliga ah ama
barnaamijyada asliga ah, ee waxa ay doonaan inay ku helaan
siyaabo bilaash ah, xaalkooduna waxa weeye Allaah ha noo
daayo Budhcada Internet ka ee wax walba noogu keenaaya
bilaashka!!! Ee waxaan ula jeedaa hadalkayga inta badan ee
iyagu dhowra una hogaansan sharciyada mulkiyada ee caalamiga
ah. Hadaba nadaamka Linux waa Nadaam u dhigmi kara oo la mid
ah kan Unix, isaga ayaana laga soo qaatay asalkiisii oo laga
horumariyay, waana nadaam xor ah oo bilaash ah, oo soo
bixitaankiisu furan yahay, faylasha soo bixitaankiisana
(source files) aad arkaysid, waxana u suura gal ah qof
kastaa in uu sii horumariyo isaga oo aan ogolaansho
waydiisan cidna haba yaraatee, waxa bilaabay oo samayay
nadaamkan Linus Benedict Torvalds oo u dhashay dalka Finland
markuu sanadku ahaa 1991, wuxuuna soo saaray koobigii ugu
Horeeyay sanadku markuu ahaa 1994.
Maanta waxaa
kala qayb gala in ka badan kun Borogaraamiste (programers)
oo kala jooga aduunka daafihiisa. Hadaba wax iman karta
su’aasha ah ma yahay nadaamkanu mid fudud sida Windows ka
mise waa ku adag yahay in qofka caadiga ahi fahmo? Si aanan
been u sheegin, waxaan leeyahay wax kasta oo cusubi marka
hore waa adag yahay, laakiin anigu shakhsi ahaan waxaan
adeegsanaayay adeegsi caadi ah mudo igu filan aan se badnayn,
markaa aniga Oo ah adeegsade caadi ah waxaan u arkaa in
nadaamkanu wax badan ka fudud yahay tusaale ahaan Windows
Vista, maalinbana maalinta ka dambaysa waan sii jeclaanayaa
nadaamka Linux. Hadaba maxay kaga fiican tahay nadaamada la
midka ah? Waxay kaga fiican tahay way ka dheeraysaa, way ka
xoog badan tahay, way ka fududahay, way ka amaansan tahay,
wayna ka deganaan badan tahay isma taag taagto. Asal ahaan
markii hore waxa loogu tala galay oo loo samayay
shabakadaha (Net works), oo waa Nadaam ilaalsan, waxaana
loo sameeyay in uu weligiis ahaado xor iyo bilaash aan
laysku xakirin, waxaa mulkiyadiisa leh Bini Aadamka oo dhan,
waa caalami wuxuuna taageeraa afaf badan oo kala gedisan, ma
laha wax Virus yo ah iyo basaasid toona, qalabkiisu waa u
dhan yahay iyo afafka borograamintuba (programing
languages).
Linux Ubuntu
Hadaba
nadaamkanu wuxuu leeyahay qaybo kala duwan sida Windows ka
tusaale ahaan, oo weliba wadamo dhowr ah lagu kala sameeyo,
kan ugu caansan ahna kan ugu deganaashaha badan, waxaa la
yidhaahdaa Ubuntu, nadaamka Linux ee Ubuntu waxaa lagu
samayaa dalka Koonfur Afrika (South Africa), waxaana
taageero dhinac walba ah siisa shirkada Conical Limited,
kelmeda Ubuntu waxaa macnaheedu yahay dadnimo, Linux Ubuntu
waa nadaam aad looga soo dhowayay oo looga jecel yahay
Aduunka daafihiisa, shacbiyadiisuna ay sii badanayso
maalinba maalinta ka dambaysa, sababta oo ah taageerada ay
helayso iyo cusboonaysiinteeda joogtada ah, sidaas darteed
baan ana uga doortay qaybaha kale oo dhan. Ugu dambayntii
iyada oo aanu shaki ku jirin in in badan oo akhristayaasha
ahi adeegsadaan nadaamkakan, ayaan inta kalena ku dhiiri
gelinayaa bal in ay iyana eegaan oo jitaabiyaan nadaamkakan,
waxana hubaal ah inaad jeclaan doontaan.
Wabillaahi
atowfiiq
Essa Mohamoud
Aadam
almutawaadic@yahoo.com
cidii jecel
in ay aqriso qoraalada arintan laga qoray halkan ha ka
aqristo mid ka mid ah
http://www.computerworld.com/s/article/9141182/Microsoft_denies_it_built_backdoor_in_Windows_7&prev=/search%3Fq%3DNews%2Bcomputer%26hl%3Dar%26lr%3D%26client%3Dfirefox-a%26channel%3Ds%26rls%3Dorg.mozilla:ar:official%26sa%3DX&rurl=translate.google.com&usg=ALkJrhinPU8g8O-dkLNPjltzQbPABgGS_Q
webmaster@ceegaag.com |
