Talada Gudiga SSC ee Gobolka Minnesota iyo shirka Holhol‏.

(Minneapolis,  January  24,  2010 Ceegaag Online)

Tan iyo maalintii la qabsaday caasimaddii reer SSC waxaa shirar badani ka dheceen daafaha adduunka kuwaas oo badankoodii aanay suurtoobin in laga gaadho ujeedooyinkii laga lahaa oo ahayd Midaynta Shacabweynaha, xoraynta dhulka iyo xal u helida kala daadsanaanta  shacabka deegaanka SSC.

waxaa in badan laysweydiiyey meesha arintu ka dhaqaaqi ladahay. Waxaan haddaba arimahaas u kala qaadayaa saddex qaybood oo kala ah:

1-Arimo siyaasadeed,

2-Arimo dhaqaale iyo horumar, 

3-Arimo hogaan iyo midnimo. 

Waxay arrimahaasi keeneen  foolxumada maanta muuqanaysa oo ah kala qaybsanaan iyo tafaraaruq dhanwalba ah oo aanay maanta jirin wax wadatashi ama wada hawlgal ah oo arrimahaas ku saabsan.

Sida aynu wada ognahay haddii mashaqo dhacdo waa lays eedeeyaa qofba qof ama qolaba qolo ayey eedaas ku riixdaa,innaguna sidaas oo kale ayaynu waxaynu ku jirey in mudo ah isku eedaynta arimahan iyo cidii masuulkeeda lahaydba, oo aynaan cidna dhaafin Siyaasiyiin , Issimo, Qabiilooyin, Maamulo iyo deegaanoba.

Su,aasha haddaba ubaahan in laysweydiiyo waxaa weeye maxaa keenay inlayna qabsado dabadeedna sidaas laysu eedeeyo?  Maxaa khaldamay shacabku waa shacabkiiye? Mala sixi karaa wixii khaldamay? ama Sidee baa sidan looga bixi karaa? Haddaba waxaa isku khaldamay oo la garanwaayey qofwalba masuuliydiisii iyo hawshii saarnayd, Odayaashii dhaqanku waxay galeen siyaasad aanay isku aragti ka ahayn, waxay la kala safteen siyaasiyiintii maamulada ka tartamayey.  siyaasiyiintii waxay tartan u aadeen deegaano ay marti ka noqdeen aakhirkii, saraakiishii waxna waa hawlgabeen waxna xirfadoodii milateri bay meelaha maamuladu ka jiraan ugu shaqo tageen,  shacabkiina waxaa ku dhacay jaah wareer meel ay joogaanba dibad iyo gudaba.

Haddaba shirka maanta Holhol ka dhacaya oo aanu ku rajo wenahay inuu noqdo kii ugu horeeyey ee xal waaro iyo midnimo u horseeda reer SSC ayaanu talagelyo ahaan ugu soo gudbinaynaa Isimada SSC, Siyaasiyiinta , Saraakiisha Ciidamada iyo dhamaan shacabweynaha walaalaha ah ee la dulmiyey lagana faaiidaystey tafaraaruqooda dhanwalba saameeyey sida:

1-Issimada SSC waxaad in muddo ah ku jirteen siyaasad aan ahayn hawshii laydiinku caana shubay, oo ahayd gunaanad arin laysla gartay, ku duceyn , xalinta khilaafaadka shacabkiina iyo kan deriska la ah, Cadaalad iyo nabad katalin iyo midnimo taas dib ugu noqda. 

2-Waxaa isimka ka reeban eexda, ababulka dagaalka,  isqabqabsiga, shaxaadka iyo baryada iyo tartanka kursi siyaasadeed. Haddaba ka baxa siyaasada iyo arrimaha la xiriira.

3- Wuxuu isimku la shiraa ama la xaaja qaataa issimadda kale iyo dadka culimada ah, wuxuu metelaa shacab u siman sidoo kale iyaguna udhega nugul oo waa loo ergoodaa, marka joojiya lashirka madaxda iyo siyaasiyiinta danaha gaarka ah wata tartankuna ka dhexeeyo. 

4-Issimadda waxaanu idinkula talinaynaa inaad go'aan midaysan soo saartaan, Dabadeedna inaad ka shaqaysaan hawlihii aad magaca ,sharafta iyo cisiga ku lahaydeen, sidaas buu shacabku ku midoobi karaan kuna xoroobi karaan karaamadoodii iyo sharaftiina ku soo noqon kartaa.

Hadaba, haddii maanta shirkaasi hagaago waxaa soo dhawaaneysa midnimada nabadgalyada iyo horumarka beelaha SSC. Waxaana daba socon doona kuwo kale oo waxa shirkaas ka soo baxa lagu fuliyo. waxaa meesha ka baxaysa is eedayntii oo nin weliba shaqadiisuu masuul ka noqon. 

Ugu Danbayn waxaa maanta isha idinku haya oo idin soo eegaya shacabweynihii aad metelayseen dibad iyo gudaba iyo soomaaliweyn oo dhan. Waxaa taariikhda gelaya shirka Holhol iyo Issimadda SSC go'aamada ay soo saaraan maanta iyo waxay shacabkooda dulman ugu taliyaan.

Wabillaahi Tawfiiq

Farah Mireh

www.ceegaag.com

webmaster@ceegaag.com