Xuska Maalinta Haweenka ee 8 March oo laga xusey magaaladda Kampala ee dalka Uganda.

(Kambala March 09,  2009 Ceegaag Online)

Waxaa maanta si habsami ah loogu qabtay munaasabad lagu maamuusayo xuska maalinta Haweenka ee ku beegan 8 Maarso Magaaladda Kampala ee Dalka uganda iyadoona ay ka soo qeybgaleen marti sharaf kala duwan iyo haweenka gaaraya ku dhowaad 100 Haween kuwaasi oo ay ka muuqatay sida ay ugu faraxsan yihiin munaasabadani weyn oo maanta lagu qabtay gudaha dalka Uganda.
 
Xafladani oo ahayd mid lagu maamuusayey 8 maarso oo ku beegan maalinta haweenka aduunka ayaa waxaa soo qaban qaabiyey ama fuliyey Mashruuca Horumarinta Nabadda Soomaaliyeed ee Somali Intitiative for Peace and Development (SIPED) iyo Pan African Development Education and Advocacy Programmess (PADEAP) iyo weliba Young African Refugees and Development waxaana ka soo qeybgalay madax ka socatay ururadaasi iyo weliba Wasiiradii Hore ee Arimaha Dibadda Dalka Sudan iyo Agaasimayaal iyo madax qeybeedyo kala duwan.
 
Ugu horeyntii waxaa nadasha xafladaasi ka hadashay Maama Khadiijo Saciid Gurxan oo iyada ahayd (Madam Caydiid) oo hatan ah Gudoomiyaha Ururka SIPED ee Dalka Uganda iyadoona ugu horeyntii haweenka soomaaliyeed oo halkaasi isugu yimid u jeedisay amaan iyo hambalyo la xiriirta xuska maalintani lama ilaawaanka ah ee ku beegan maalinta Haweenka aduunka ee 8 March taasi oo meelo faro badan laga xusay maanta iyadoona qirtay in ay haweenku yihiin lafdhabarta bulshadda haween la'aantoodna aan la noolaan karin iyadoona haweenka soomaaliyeed ugu baaqday in ay ka shaqeeyaan nabadda iyo kala danbeynta meel weliba oo ay aduunka ka joogaan ugu danbeyntiina maamo Khadiijo oo ah iyadda qofka soo qaban qaabiyey munaasabadani weyn ayaa waxa ay haweenka ugu baaqday in ay had iyo jeer isku duubnaadaan islamarkaasna ka hortagaan wax weliba oo dhibaato keeni kara.
 
Xafladani oo ahayd mid aad u balaaran islamarkaasna ay ka soo qeybgaleen haweenka ku dhaqan dalka uganda ayaa waxa kaloo halkaasi ka hadley Micheal Maphiya oo isaga ah Agaasimaha PEDEAP ee dalka Uganda isagoona uga salaan iyo boogaadan ku aadan xuskani halkaasi uga soo jeediyey haweenka soomaaliyeed oo ah kuwo dhibaatooyin faro badan soo marey mudadii ka danbeysay dawladii hore ee Jaale Maxamed Siyaad isagoona tibaaxay in dumarku ay leeyihiin xuquuda raga mid ah la mid ah islamarkaasna ugu baaqay bulshadda caalamka in aan la takoorin haweenka.
 
Ugu danbeyntii waxaa halkaasi ka hadley Agaasimaha Waaxda Horumarinta ee Ururka Islaamka isagona halkaasi isna salaan ku aadan munaasabadani uga soo jeediyey haweenka isugu yimid nadasha shirkaasi.
 
Munaasabadani weyn oo ku beegan maalinta haweenka aduunka ee 8 march ayaa waxa ay noqonaysaa markii ugu horeysay oo laga xuso dalka uganda iyadoona ay maanta isku xilqaameen in ay xusaan xuskani oo ah mid ahmiyad gaar ah u leh haweenka soomaaliyeed haweenka ku dhaqan qurbaha dalkani Uganda iyadoona halkaasi lagu soo bandhigay heeso iyo cuyaaro iyo majaajalooyin ka turjumaya maalinta haweenka ee 8 March iyadoona ay halkaasi heeso macaan ku soo bandhigtay Fanaanada Muslimo Qaasim Hilowle, waxaa kaloo iyana sidaasi si la mid ah ciyaaro xiiso badan ku soo bandhigay dhalinyaro reer Uganda oo iyaga halkaasi ku soo bandhigay mucjisooyin layaab leh.

Daawo Sawirada

 
Xuseen Cabdulaahi Xasan
E-mail Xuseen339@hotmail.com
Kampala Uganda

webmaster@ceegaag.com